|
|
|
Seite 1
Chronica New gemacht vnnd beschriben von dem Edlen geschlächt der Notthafften von Wernberg, Aholming vnnd Runting etc. von Irem herkhomen In diss Bayrlanndt, von ainem auf den anndern viller Jare nachein= annder auch Fleissiglich beschriben Durch den Erwirdigen vnd geistlichen Herrn: Geörgen rettinger, Briester vnd der Zeitt Kürch= herr vnd Pfarrer Zue Ahelming, Passawer Bystumbs, Dyss in dz 1531 Jare vollendt worden. Gott sey allain lob vnd Ere In Ew= igkait Amen. Seite 2 Dem Edlen vnd Vesten Haimeran Notthafft von Wernberg Zu Ahelming vnd schneiding etc., des Durchleuchtigen Fürsten vnd Herrn, Herrn Ludwigs, Pfalzgraue pey Rein, Hertzog in Obern vnd Nidern Bayrn etc. der Zeit Lanndtpfleger Zu Fylshoffen etc. Wünsch ich, Georg rettinger, Kürchherr vnnd Pfarrer Zu Ahelming von got vnnserm Herrn vnnd Heylandt Jesum Cristum genadt vnndt fridt, Als meinem pesundern gunstigen vnnd gepietenden Herren etc. Edler Vester gunstiger Herr, Wiewoll mir Am Wenigsten mecht bewist sein von disem Edlen Hochgeachten vnnd peruembten Alltem ge- schlecht der Notthafften Zueschreiben. Jedoch pewegt mich mein Langs peleiben Vnnd Anwesen, so Ich lannge Zeit mit Hauss . . . Ein vicari[us] vnnd Kürchherr Piß hieheer In das xvj Jare In Eur vnnd Eurer vett[er]n Herrligkait Zu Aholming Heyslichen gesessen pin, vnd noch lenger, Als got will hausen mecht, vnnd in solcher Zeit von Eur Herrlikait vatter vnd vettern, Auch von Anderm souil grunttlich Erfaren vnd pericht pin worden, Wie das der Erst Notthafft, so in disses bayrlandt khumen ist, hat gehaisen mit Namen Albrecht Nothafft, vnnd von disem Albrecht komen here oder haben Iren Vrsprung dise geschlecht der Notthafften, die von Runtting vnd auch die von Aholming, Alle von Wernberg etc. vnd wiewol auch noch mer ander Notthafften sein, Als die sich schreiben von Hueben= stain vnnd auch noch ander, welliche Alle aines Wappen vnnd schült sein, Aber nit aines Klainetz Auf dem Helm etc., dann die von Huebenstain fueren Einen syttich auf Iren Helm. Aber die von Wernberg die fueren einen weissen Praschen mit schwartzen schecklein auf Iren Hellm etc. Also will ich schreiben von disem Albrecht Notthafft, der der Erst ist des Namens vnd komen in diss Bayr= landt von dem Here dyss Edl geschlecht In grosser glückhselligkait vnnd mit grossen Perüeme In Dugenten vnd Eren Pyss hiehere In das 1531 Jare geregiert, wie dann von Ainem auf denn Andern klarlichen angezaigt wierdt. Ob aber Aynicherlay dar= inen gefunden würdt, daruber sich mecht Zweifflung erheben, Soll es allen gelerten vnd der Hystorien erfarnen williklich Seite 2r Haim gestellt werden, solliches Zu Endern, bessern vnd nach Brueder= licher lieb Corrigiert werden etc. Solche kurtze chronica hab ich eur Vest vnnd Herrligkait Zue vnnderthänigem gefallen wellen schreiben, Bit Also E. V. mich beuolchen haben. Datum Aholming Im Pfarr- Hof Auf den 10 Tag Augusti, Anno dom. 1531. Die genad Gottes sey mit Vnns allen, Amen. Albrecht Notthafft der Erst des Namens zu Wernberg, Ritter etc.. Diser Albrecht ist gewesen ein dapfferer ritter In Kriegs Handlen geuebt vnnd anschlegig, Auch ein gebornner Holandder. Alß aber der durchleuchtig Furst Hertzog Albrecht Auß Bayrn, der Erst des Namens, Kayser Ludwigs des iiij Sune etc. In dye Nid[er]= Land kome, Alls in Holanndt, Hannegaw, Selandt, Frieslandt etc. vnnd dise benente Landt von wegen (sein vnd seine[r] brued[er]) auß Muett[er]lichen vnd vatt[er]lichen Erbfall Zu Herschen vnnd Sto= gwen het eingenomen. Do khome der Obgedacht Herr Albrecht Notthafft von wegen seiner guetten ritterlichen thatten pey dem gedachtem Fursten Zu sundern genaden, vnnd wart manigfeltigclich In Kriegen Zu einem Hauptman gepraucht vnd was Ime von dem Fursten pefolchen werd, darin wart er nit saumlich Sunder furderlich vnnd aufrichtig etc. Als aber der gedacht Her[r] vnnd Fürst, Hertzog Albrecht, Etwo vill Jare In Hollandt auch Andern etc. geregirt het, Vnnd er mit Alter beladen ward, Do gab er seine Landt, Als Holandt, Seelandt, Hannegaw, Frys- landt etc. seinen dreyen Sunen vber Zu regieren pey seinem Leben, vnd er Nam Ime füer widerumb in sein Vätterlich Landt gein Bayrn Zue khomen, darin auch Zusterben. Also zog vnd khame Hertzog Albrecht widerumb In das Bayrlandt Seite 3 vnnd mit Ime gebracht vntt[er] andern seinen Trewen diennern, dem mer gedachten ritter Albrecht Notthafften, vnnd dem Zue Aygen eingegeben die Herrschafft vnnd das schloss wernberg, mit allen Eren, Nutzenm Zu gehörn, Ime vnnd allen seinen Erben vnd Nachkhomen etc. Also ist Wernberg die Erst Herrschafft An disem Albrecht Nothafft khomen etc. Auch hab ich gehert, wie das dyser Herr Albrecht Nothafft Einen Prueder soll gehebt haben, dem sye das schloss Huebenstain Eingegeben worden vnd von dem sollen die Notthafft, die den syttig Zue einem Klainodt fueren auf Iren Helbmen iren Vrsprung her haben. Ob dem Allso sey oder nit, Lass ich geschehen. Es mag aber gleich wol sein, wilss aber nit für gewiß hie mit ein= gesetzt haben etc. Aber der Obgedacht Herr Albrecht Notthafft Zu Wernberg hat sein maist Anwesen bey seinem Herren Hertzog Albrechten Zu Straubing gehabt vnd der selb Fürst Hertzog Albrecht hat auch das Closter Zu Straubing von Neuem Aufgepaut vnd gestifft, vnd ist gestorben alls man Zalt hat 1397 Jare vnnd ligt auch daselben Im Kore In einem Erhebten grab begraben, dem got genad Amen. Vnd aber diser beruempt Rytter Herr Albrecht Notthafft sein Maist wesen In seinem Leben pey Hertzog Albrechten gehebt het, Also hat er auch Nach seinem absterben pegerdt bey Ime des gotlichen vnd Angstlichen gerichts Zu erwarten vnd deshalben sein Grebnuß Füer sich vnnd sein Erben verordent vnnd gestifft Ein Alttar mitten In kore aufgericht Zu negst hinder des Fursten grebnus. Vor dem selben Alttar ligt diser Herr Albrecht Notthafft vnnd Neben des selben her vmb alle Ander Notthafften des ge= schlachts mit Iren Hausfrawen etc. Diser Herr Albrecht Not= hafft ist auch ein Mittstiffter des Closters Zu Straubing vnd hat aus seiner Eegemahel geborn vntter Andern Ainen Sune, genandt Haynrich, der hat Ine geerbt. Als aber diser Seite 3r offtbenant Herr Albrecht Notthafft nach seinem Herren He[rzo]g Albrecht nit lenger dan 3 Jar gelebt hat, ist er saligklich in got entschlaffen, Als man hat geZelt 1400 Jare Zu der Zeit Als der Römisch Kunig Rueprecht, auch ein Fürst am Rein vnd In Bayrn Zu Reich erwellet was waren etc. vnd aber diß Albrechten Leichnams Ward begraben Im Closter wie vor gesagt ist dem Got genadt Amen. Hainrich Notthafft der erst des Namens Zu Wernbergk vnnd Ritter etc., Herr Albrecht Notthafft des Ersten sune etc. hat also bald Nach absterben seines vatters sein vetterliche Herrschafft Wernbergk Zu Regiren Angehept vnd angefang[en] etc. Disem gestrengen Ritter, Herr Heinrich Notthafft ward ein tugent= reiche Junckhfraw mit Namen Angnes geborn von Gumppenperg, Auch eines Ritters Dochter, Eelichen ver- treuet, aus derselben hat er ge= boren vnnder anndern etc. iiij sun, mit Namen Heymeran, Caspar, Albrecht vnd aber ein Haynrich, die haben Ine geerbt etc. Diser vorbenent Herr Hainrich ward vitztumb In Nidern Bayrn Zu Straubing, Auch Erobert er Auß gunst der Fürsten das schloß vnnd die Herrschafft Runt- ing Mit allen Iren Nutzen vnnd Zugehern, Auf sich vnnd seine seyne Erben vnnd Nachkhomen Ewiglich[en] etc. Auch hat diser beruembt ritter Herr Hainrich Notthafft das schlos yseraw vnd Auch Aholming, Petzling, Tabertzhaus[e]n vnd Andere stuckh vnnd guete gueter von den Kamerauern, Auch vom Stifft Pasaw Zu der Zeit byschoff georgen, graffe Zu Hohenloch, an sich pracht vnd gekert hat, Als man hat gezelt 1416 Jare etc. Dernach Seite 4 Etwo vber 5 Jare von Kayser Sigmundt Freyheit Erlanngt vnnd ein gefreitte Herrschafft Zu Aholming Zugericht, Auch als man zelt hat 1421 Jare, do starb sein gemahel, Fraw Angnes von Gumppenperg, die wardt Zu Straubing Im Closter Eerlich begraben, der got genad Amen. Auch hat diser Herr Hainrich das selb Closter mit guetten, gulten vnnd Zinsen begabt vnd gemert mit gottes diensten, Auch Alle Mitwochen Einen Vmbganng mit dem Hoch= würdigen Sacrament Im selben Closter gestüfft etc. Als aber diser Herr Hainrich Nach seines vatters Absterben Piis in dz 39 Jare geregirt het, Ist er auch selliklich In got entschlaffen vnd sein leichnam Im Closter Zu Straubing Pei seinen Vatt[er] begraben, dem got genad, Amen, Als man Zalt 1439 Jare Zu der Zeit des Remischen Kunig Albrechten des anndern etc. Haimeran Notthafft der der Erst des Namens Zu Wernbergkh vnd runting, ritter etc. Herr Heinrich Notthafft des ersten sune, Aus der Tugentreichen Frauen Angnes von Gumppenberg geboren etc., ein man (von) gross gemueth, ritterlicher sachen geuebt vnd wol kundig. Diser Herr Haimeran Notthafft ist auch des durchleuchtigen Fursten vnd Herrn, Hertzog Albrecht des iij Ein guette Zeit Vitztumb In Nidern bayrn Zu Straubing gewest etc. Disem Herr Haimeran vnd auch seinen brueder Herr Albrecht Notthafft ge= füel an der taillung Vätterlicher Erbschafft das schlos vnnd herrschafft Runting vnnd dar Zu halber teil am Wernbergk, so belib den Zwayen bruedern, Herr Casparn vnnd Herr Hainrichen Zu Irem Vätterlichen Erbfall das schloß Yseraw vnnd die Herr= schafft Aholming vnnd dartzu halber teil Am Wernbergk etc. Als aber diser Herr Haimeran Nach seines Vatt[er]s absterben Seite 4r biß in das 16 Jare geregiert het, ist er gestorben, als man het gezellt 1455 Jare, Zu der Zeit keyser Friderichs des dritten vnnd Hertzog Albrechts des iij Zu München, vnnd auch Hertzog Ludwigs des xij Zu Landshuet etc. Aber sein leichnam wardt Zu Straubing Im Closter pey seinem Vatter vnnd anherrn pegraben, dem gott genad Amen. Caspar Notthafft der erst des Namens Zue Wernbergkh vnnd Aholm- ing, Rytter etc., Herr Hainrich Notthafft des ersten Sune, Auss der Tugent- reichen Frawen Angnes von Gumppen- perg geboren etc., Herr Haimeran Nott- haffts Prueder etc. Diser Herr Caspar Nothafft het das schloss Wintzer mit seinem Zugehern Inen, wais aber nit aus was gerechtigkeit etc., er het auch zu dem gotzhaus Weychenstetten verschafft zu dem gebawe daselbst drew hundert g[u]ld[en], die nam sein brueder Herr Hainrich Notthafft vnd verpauts an das Klösterl mit Anndern gotprath daselbst Zu weihenstetten etc. Als aber diser Herr Caspar nach seinem vatter pis in das 19 Jar vnd nach seinem brueder Herr Haimeran Pis in das 3 Jare gelebt vnd geregirt het, ist selikhlich von diser Wellt mit todt verganngen Als man hat gezelt 1458 Jare, Zu der Zeit Kayser Friderichs der iij vnd Hertzog Albrechts zu Münch[en] des iij, Auch Hertzogs Ludwigs Zu Lantzhuet des 12. Aber sein Leichnamb wart Zu Straubing Im Closter pey seinen Vor eltern vergraben, dem gott Genadt, Amen. Seite 5 Albrecht Notthafft der Annder des Namens, Zue Wernberg vnnd Runting, ritter etc., Herr Hainrich Notthafft des ersten Sune vnd Herr Albrecht Notthafft des ersten Ennekl, dartzu Herr Haimeran des ersten vnnd Herr Caspar des ersten auch Herr Hainrich des andern hernach penentn prueder auss der Tugent= reichen Frauen Angnes von Gumppen= perg geboren etc. Ein gestreng[er], dapffere[r] ritter. Disem Herr Albrecht vnd auch seinen prueder, der Herr Haimeran Notthafft, gefuel an der Tailung vätterlicher erbschafft das schloss vnd herschafft runting vnd dartzu halber tail an wernberg. So belib den Zwayen bruedern, dem Herr Hainrich vnd Caspar Zu Irem vatterlichen Erbfall das schloss Ysaraw vnnd die Herrschafft Aholming vnnd dartzu halber tail an Wern- berg etc. Diser Herr Albrecht het grossen gunst pey den Fürsten, darumb pracht er fül geschlosser Zuwegen etc. Disem Herr Al- brecht Notthafften wardt ein wolgebornne Edle Junckhfrau, von Abensperg geboren, verheurat. Auß der het er vnnder and[er]n geporen ein Dochter vnnd einen sun Hainrich genant, der iij des Namens etc. Die Dochter gab er noch In seinem leben Herr Georgen von Klossen Zu der Ehe geen gern. Auch ver- sach er seinen sune hainrich mit einer Edlen Tugenthafften Junckfrawen , mit Namen Anna, Geborn von Hürschorn. Aber sie lebt nit lannge vnd starb als man Zelt 1467 Jare vnd ligt Zu Straubing pegraben etc. Alls aber diser Albrecht Nach absterben seines vatters pyss in das 29 Jare geregirt het, ist er selligklich In got entschlaffen Als man hat geZelt 1468 Jar Zu den Zeitten Kaiser Friderichs des iij, Hertzog Albrechts Zu München des iiij vnnd Hertzog Ludwigs Zu Seite 5r Lanndshuet des xij vnnd liess seinen sonne Hainrich seine Erbschafft Nach Ime regieren. Aber sein Leichnam wardt Zu Straubing Im Closter pey seinen Vor eltern gar Erlich begrab[en], dem got genadt, Amen. Heinrich (notthafft) der Ander des namens zu wernberg vnnd Aholming, Auch Zu Eck- mül, Ritter etc., Herr Heinrich Notthafft des ersten Sune aus der Tugentreichen Frawen Angnes von Gumppenperg geboren vnnd herr Haimeran des ersten, Herr Casparn des ersten, Herr Albrecht des andern der Notthafften Prueder etc. Ein ernreicher Peruemt[er] ritter. Disem Herr Hainrich vnnd auch seinem Prueder dem Herr Caspar Notthafft gefuell an der Taillung vatterlicher Erbschafft dz schloss Yser= aw vnd die Herrschafft Ahelming, dartzu halber teil An Wernberg, So belaib den Zwayen Pruedern dem Herr Maimeran vnnd Herr Albrecht Zu Irem veterlichem Erbfall das schloss vnnd herrschafft Runtting vnnd dartzu halber teil An Wernbergkh. Diser beruembt ritter Herr Hainrich Notthafft pracht guette schlosser vnnder sich, Als Weix, Eckhmüll vnnd ander etc. Diser Herr Hainrich Notthafft hat Zwaye Eeliche weiber Nacheinander gehabt, Erstlich ward Ime ein Edle Wolgebornne Junckhfrawe mit Namen Margreth eines grauen Dochter von Orttenwergkh verheurat. Aus der selb[en] gräffin hat er geboren vntter andern ein Tochter vnnd einen Sune. Die Tochter mit namen Stolastica Wardt einem Sey= boltstorffer verelicht, der Sune hueß mit Namen Hainrich der iiij des Namens. Aber die graffin starb, Do nam Seite 6 er die Tugenthafft Anastasia ein gebornne Hoferin Zu der Ehe, Auß d[er] hat er Auch geborn annder Zwen Sune mit Namen Haimeran den andern vnnd georgen den Ersten, die Notthafften etc. Diser Herr Hainrich hat gar füll gepauet An seinenn geschlössern (als Zu Eckh- müll vnnd sunderlich hie Zu Ahelming hat er den Vorhoff Am geschloss Zu Iseraw vmb vnnd vmb von Neuem auf gepeuet, dartzu das schloss vmb vnnd vmb, Alß Zwey gaden heher Aufgebauet vnnd erhecht, Er hat auch das Klösterl Zu Weyhenstetten An die Kürchen da selben Mit dem Gotpradt, Auch mit denn drey hund[er]t g[u]ld[en], so sein brueder Herr Caspar Notthafft darZu verschafft hat, von Neuem aufgebaut etc., dann er war willens Pettler= Munch darein Zestifften, das mecht vnnd khundt er nit erlanng[en], weder von geistlichen noch welltlichen Fürsten etc. Dieser Herr Hainrich Notthafft hat auch lehen Empfanngen von dem Hoch wurdigen byschoffs vlrich von Nusdorff des schlechts, der Zeit bischoff Zu Passaw etc. Diser Notthafft hat auch ein Tegliche mess Zu Weihenstetten aufgericht, sie wardt aber nit gestat, darumb ist sy auch schon Abganngen, Als Nu aber diser beruembt reich Ritter Herr Hainrich Nach seines Vatters Absterben Pis in das xxxij Jar geregiert hat, ist er gar selligklich in got ent= schlaffen, alls man het gezelt Nach vnnsers Herrn geburt 1471 Jare zu den Zeiten, des aller durchleuchtigst[en] Herren Kayser Friderichs des dritten vnnd Hertzog Ludwigs Zu Lanndshuet des xij, Auch Hertzog Albrechts des iiij Zu Minchen, Paid Regierent Fursten In Bayrn, Aber sein Leich= nam ward Zu Straubing Im Closter pey seinen Eltern vergraben, dem gott genad. Amen. Seite 6r Hainrich Notthafft der drit des Namens Zu Wernberg vnnd runt- ing ritter etc., Herr Albrecht Nothafft des andern sune auss der Edlenn vnnd wolgebornnen Frauen von Abmsperg Freyin geboren, Herr Hainrich Notthafft des ersten Eneckhl vnnd Herr Hainrich Notthafft des anndern bruedern Prued[er] sune oder vetter etc. diser HGerr Hainrich hat auch Zway Eehweiber nacheinand[er] gehapt, die erst mit Namen Anna ge= born von Hürschorn, die het er genomen noch in leben seines vatters, die starb Paldt als man het gezelt 1467 Jares vnnd die ligt Zu Straubing begraben Im Closter etc. Darnach vber lenng nach absterben Auch seines vatters, do nam er Ime Zue der Ehe ein Edle dugenth dugenthaffte Junckhfraw mit Namen Margretha ein gebornne Pfluegin von Rabenstain, Auss der het er vnnder andern geborn Ein sone, auch hainrich, der egenant der hat Ine geerbt etc. Diser Herr Hainrich hat auch gar fül gepauet An seinen geschlossern, Als er aber nach seines Vatters absterben pis in das 40 Jare geregiert hat, ist er von diser welt gar selligklich mit tod verschiden, als man hat gezelt Nach der gepurt (Christi) vnsers herrn 1508 Jare, Zu den Zeiten des allerdurchleichtigsten Herren Remischen Kunig Maximilian des ersten des Namens vnnd hertzog Wolfgang des Ersten Zu München, Als ein Vor= mundt des Jungen seines vettern Hertzog Wilhelms des viert[en] Regirenden Fursten In Bayrn etc. Aber sein leichnam wardt Zu Straubing pei seinen Elttern vergraben dem got genadt Amen. Seite 7 Katherina Klosnerin Zu Gern, ein gebirnne Notthafftin von Wern= berg vnnd Runting etc. Herr Albrecht Notthafft des andern Tochter, aus der Edlen vnnd wolgebornnen frawen von Abmsperg Freyin geboren, Herr Hainrich Notthafft des ersten Enecklin vnnd Herr Hainrich Notthafft des andern brueder dochter oder Pass etc. Dise Notthafftin war einem Ritter mit Namen Herr Georgen von Closen Zu Gern Eelich vertrauet mit dem sie ein guete Zeit mit glückh= selligen Wesen In grossen Eren vnd Freiden gelebt, aber kaine Leibs erben pey Ime erworben vnnd Nach sag der die sich geseh[en] haben, ein wunder hüpsche fraw mit schönen vnd vill werp= lichen Dugenten hochgeziert gewesen etc. Wellcher auch der durchleuchtig vnnd hochgeboren Fürst Hertzog Georg von Lantzhuet, Als ein Junger Fürst, der selben Zeit Offtmallen Zu lieb vnnd diennst geritten, Aber nit fyl (viel) kunden noch mögen seinen gefallen schaffen noch ausrichten, Auch ist geschehen, Auf ein Zeit vnnd ist endtlich ware, wie das der gedacht Furst Hertzog Georg auf ein Zeit etwo spat ist khomen geritten mit den seinen An das thore Am schloss Zu Gern vnnd begert einzulassen. Do Ime aber der von Klosen sollichs widersagt vnd nit stat wolt thuen, do liess Ime der Mergemelt Fürst Hertzog Georg seine Trumeter das liedt den Eyfferer Pfeiffen vnd dartzu alles hey, souill der Zeit Auf den Wisen An den schobern stuendt, das liess Er Ime Alles Zu rachsall verprennen etc. Seite 7r Als aber dise fraw Auch Ir gemahel Herr Georg von Klosen starb, do erbet sie Herr Hannss von Klosen Zu Arnstorff, ritt[er] Aber Ir leichnam war bey andern Klosnern vergraben, dem got genad. Amen. Hiepey ist auch Zumerckhen, wie das die gedacht Fraw Katherina von Klosen etc. ist auch des vorgedachten Herr Hainrich Notthafft des dritten des Namens Zu Runtting Eeliche schwester gewesen. Stolastica Seyboltstorfferin Zu Seiboltstorff vnnd Nidern Bering, ein ge= bornne Notthafftin von Wernberg vnnd Ahelming etc., Herr Heinrich Notthafft des andern Dochter Aus der Edlen vnnd wolge= bornnen Frauen Margaretha gräffin von Ortenberg geboren, Herr Hainrich Notthafft des ersten Enecklin vnnd Herr Albrecht Nott= hafft des Andern Brueder Dochter oder Pass, Auch Herr Hainrich Notthafft des viertten hernachpenent[en] Eeliche schwester p. dise Notthafftin wardt einem Ritter mit Namen Herr Lamprecht Seyboltstorffer Zu seyberstorff vnd Nider Pering Eelichen vermehelt, mit dem sy ein Zeit lanng In Eren gelebt. Aber kainen leibs Erben erob[er]t. Ein Tugentliche Fraw gegen Armen vnd reichen. Auch der gotshauss Ere vnnd gotz diennst hochgeflissen. Diser frauen Herr vnnd gemahel war auch gar ein peruembter ritter, Als er auf Ein Zeit geen Teckhendorff Oder Aber daruon wolt reitten, do erfuel er sich Zu Todt Ab einem Pferdt, das geschahe Nachet Pey dem Nidern werckh, daselben ist seines fals vnnd sterbens Ein stainene Martter Zu gedechtnus Aufgericht vnnd seins leichnams wardt mit grosser klag geen Seyboltstorff gefuert vnnd daselbst In der Pfarrkürchen Nach Ritterlichen Eren pegraben pey seinen Voreltern, dem got genadt. Amen. Seite 8 Hainrich Notthafft der vierdt des Namens Zu Wernberg vnnd Ahelming, Ritter etc. Herr Hainrich Notthafft des andern sune, Aus der Edlen wolgebornnen frawen Margaretha gräfin von Ortten= berg geboren, Herr Hainrich Notthafften des ersten Enenckhlin vnd Herr Albrecht Notthafften des andern Prueder Sune od[er] vetter, Auch der Jetzo vorpenenten seybolt= storfferin prued[er] etc. Diser Herr Hainrich ein guetter beruembter ritter Zu allem ritterspill vnnd ritterey geuebt vnnd wol khundig etc. Er hat auch Zway Eeliche weiber Nacheinander gehapt, die erste haist mit Namen Barbara, ein dugentliche Junckhfrawe geporen von hohen rechperg. Aus der hat er nur ain khindt geboren, darnach starb Ine die selb fraw, so lebt auchg das khindt nit lanng nach ir vnd starb Auch darnach vberlang. Do ward Ime ein andere dugenthaffte Junckhfrawe ver= mehelt, mit namen auch Barbara, geboren von Rorbach, auß dem Lanndt Esterreich. Aus der selben hat er geboren vnnder andern Zwen sune mit Namen Caspar vnnd Hanns die Notthafften etc. die haben Ine geerbt. Diser Herr Hainrich alls der Elter vnnder seinen Pruedern het auch die gotsgab die Mess in der Veste Zu Yseraw pey Ahelming verlihen dem Herr Hannsen Aman von kurtzen Puerttig, einen Priester vnd das geschahe Als man Zellet 1483 Jare Am sonntag nach Michaelis, Als auch Herr Jacob Fride= mair ein Inhaber der selben Mess gestorben was etc. Als aber diser Herr Hainrich nach absterben seines vatters pis in das Jare geregiert het, ist auch selligklich in got entschlaffen Als man hat Zelt Jare Zu den Zeiten Kunig Maximilians des ersten vnnd Hertzog Georgen Zu Landshuet, Auch Hertzog Albrechten des iiij Zu Minchen, baidt Regierendt fürsten zu Bayrn etc. Seite 8r Haimeran Notthafft der ander des namens Zu wernberg vnnd Ahelming, ritter etc. Herr Hainrich des andern sune aus der Edlen vnnd Tugenthafften frau[en] Anastasia Hofferin geboren, Herr Hain= rich Notthafften des ersten Enenckhl vnd Herr Albrechten des andern Prueder sune Oder vetter, Auch Herr Heinrich Notthafft[en] des iiij jetz vorbenenten Prueder, Aber allain vom vattern etc. Diser Haimeran Notthafft war der Jungst vnder seinen bruedern, Darumb het er auch die wall In der Taillung, Als sie die guetter vnnd das schloss Zu Ahelming miteinander tailten. Ime wardt auch ein Edle vnnd Tugentreiche Junckh= fraw mit Namen Anna, Ein gebornne Pflugin von Rabenstein Eelich vermehelt, auß der hat er geboren zwo Dochter vnnd ain sune mit Namen Pernhart, der hat Ine geerbt etc. Diser Haim= eran Notthafft wardt auch des durchleuchtigen Fürsten vnd herrn Hertzog Georgen Landtpfleger Zum Nadernberg vnd als er aber vber Mer fuer vnnd willen het Zum heilig[en] grab vmb Er vnnd Ritterschafft, da Pelaib er aus vnnd starb Als man Zelt Jare Zu den Zeitten Kunig Maximilian des ersten vnnd Hertzog Georgen zu Landshuet, Auch Hertzog Albrecht des iiij Zu Minchen Bayden Regierenden Fursten In Bayrn etc. Diss Herr Heimeran Notthafft Hausfraw vnd auch des Herr Hainrich Notthafft des dritten Hausfrawe sein Zwo leiblich schwester gewesen, den got genadt. Seite 9 Georg Notthafft der Erst des Namens Zu Wernberg, Ahelming vnd rätzmarstorff etc. Herr Hainrich Not- hafften des Andern sune aus der Edlen vnd Dugenthafften Frawen Anastasia Hofferin gebornn, Herr Hainrich notthafften des Ersten Eneckl vnd Herr Albrecht Notthafft des andern brueder sune Oder vetter, Herr Haimeran Notthafft des andern brueder, Auch herr Hainrich des viertn brueder, aber allein vom Vattern etc. Disem Georgen Notthafft wardt ein Edle wolgebornne Junckhfraw mit Namen regina ein gebornne freiin v[on} Stauf Eelichen vermehelt. aus der hat er geborn ain Dochter mit Namen Katherina vnd einen sune der hieß mit Namen Albrecht der drit des Namens der hat Inne geerbt etc. Diser beruembt Georg Notthafft kam auch in lebler Pundt mit andern wider Hertzog Albrechten den iiij Zu Minchen, darumb kham er Zu vngnaden bey dem selben fursten vnd aber er het ein geschloß Auerwergk genant In Hertzog Albrechts Landt gelegen, das verkhauffet diser Notthafft vnd vmb das selb gelt khauffet er Ime ein Anders schloss rätzmarstorff genanndt, Im Pistumb Pasaw gelegen, Auzf siuch vnnd seinen Sune Albrechten etc. Aber sein Dochter Katherina gab er einem Peruembten ritter Herr Georgen Wispeckh Zu der Ehe vnd gab Ime auch dartzu Am Heyrat= guet seinen tail am schloss vnd herrschafft Wernberg, des gleichen verkaufften Auch seine vettern, als Casparn, Hanns, Pernhart, auch der Hainrich von Runtting dise Notthafften, Alle die verkhaufften alles was sy an Wernberg heten dem gedachten Herr Georgen Wyspeckh, Dises Georgen Notthaffts Seite 9r Dochterman etc. Also ist Wernberg von dem geschlecht d[er] Nothafften An das geschlecht der Wyspecken komen etc. Diser georg Notthafft wardt Zu Eckmüll gebornn, als man Zelt hat 1455 Jare Im selben Jare wardt auch Hertzog Georg gebornn etc. Diser Notthafft het lannge Zeit diennst vnnd guette Ämpter pey dem von Pasaw Auf das letz ward er auch Pfleger Zu Nadernberg vnd Im Pairischen Krieg kame er widerumb Zu gnaden pey H[er]zog Albrechten. Als er aber nach absterben seines vatter pis in das 40te Jare geregiert hat, ist er selligklichen in got entschlaff[en], seines alters Im 56 Jare, Als man hat Zelt 1511 Jare Zu den Zeitten des Remischen Kunigs Maximilian des Ersten, Auch Hertzog Wolffganngen des ersten, als vormundt seines Vetters Hertzog Wilhelm des iiij regierendt Fursten In Bayrn etc. Diser Notthafft vnnd sein Hausfraw ligen Zu Straub= ing pegraben, den got genadt. Amen. Katherina Wyspeckhin Zue fellterns (dorff) vnnd Wernberg etc. ein ge= bornne Notthafftin von Wernberg vnd Ahelming etc. des Georgen Nott= hafft des Ersten Dochter auss der edlen wol gebornnen Frawen Reigina von Stauf freyin geboren, Herr Hainrich Notthafft des Andern Eneckl vnnd Herr Haimeran Notthafft des andern, Herr Hainrich des iiij brued[er] docht[er] oder Pass etc. Dise Notthafftyn wart noch in leben Ires vatters einem Ritter mit namen Herr georg Wis= peckh Zu felttens (dorff) Eelichen vertrawet vnd bey dem selben schöne sune vnd döchter erworben, der aine wart auch nachmallens dem thaymer geen dorfspach verheirat etc. dise Tugenthafft Frawe Wispeckhin starb nach Irem Seite 10 nach Irem vatter In dem funfften Jare (als man Zalt 1516sten) Jare Zu der Zeit Kunig Maximilianus der got genadt Amen. etc. Pernhartt Notthafft der erst des Namens von Wernberg Zu Ahelming etc. Herr Haimeran Notthafft des Anndern sune aus der Tugent= reichen Frawen Anna Pflugin von rabenstain Geborn, Herr Heinrich notthafft des anndern Eneckl vnnd des Jergen Notthafften Prueder sune oder vetter etc. Disem Pernhardt Nott= hafft ward ein Edle dugenthaffte Junckhfrawe mit Namen Barbara ein geborne Laymingerin von Ahaim, Eines Ritters Dochter Eelich vermehelt, aus der hat er geboren Zwen sun mit Namen Haimeran vnnd Hanns Jacob etc. Diser Notthafft hat füll muessen Geduldten vnnd vergebens In tail geben Im Bayrischen Krieg hie Zu Ahelming, Alls Hertzog Albrecht mit seinem grossen Here hie auf dem Moss lege vnd sich für die Stadt Landaw weldt legern etc. Nachdem aber diser Pernhardt Notthafft Ein Junger Herr Aber ein schwacher krannckher man seins Leibes wardt, do thet er sich mit seinem Hauschoben hinein geen Deckhendorff vnnd hauset daselb Ettwo lannge, Auf das letzt kame er geen Hengersperg vnd wardt der fürsten Landspfleger daselb etc. Aber er lebt nit lennger dann vj woch[en] Ime selben Pflegambt vnd starb am Erichtag nach dem Suntag Oculy in der Vasten, Als man Zelt hat 1514 Jare zu der Zeit des Remischen Kunig Maximilian des Ersten vnnd Hertzog Wilhelms des iiij vnd Hertzog Ludwigs des 14. baid[en] Regierenden fursten. Aber sein Leichnam wardt geen Straub= ing gefuert vnnd daselb pey seinen Voreltern pegraben, dem Seite 10r got genadt. Amen. Dises Notthafften gemahel vnnd gelassne Wittib pesas vnnd vermeset die Pfleg Zu Henngersperg das Jare hinaus, darnach kame sie wider her geen Ahelming vnd hat da gehauset pis dz Ir sune der elter sich vermehelt hat, darnach ist sy an des fursten Hoff geen Newburg komen vnd bey Hertzog Othainrich vber sein Frauen Zimer Hofmaist[er]in worden vnd daselb pis auf heutigen tag In grossen Eren gehallten etc. Felitz von sackhendorff ein ge= bornne Notthafftin von wernberg vnnd Ahelming, des Herr Heimeran Nott= hafften des ij dochter aus der Tugent= reichen Frawen Anna Pflugin von Rabenstain geboren, Herr Hainrich Notthafft des andern Enneckhin vnd des Pernhardt Notthafften schwester etc., dise dugenthafft Junckhfraw ward einem seckendorffer Eelich vermehelt vnd mit den ein guette Zeit in glücksellig[en] leben gelebt. Anna von Waldaw ein gebornne Notthafftin von Wernberg vnnd Ahelming etc. Herr Haimeran Notthafft des andern dochter aus der dugentreichen Frawen Anna pfluegin geboren, Herr Hainrich nott- hafft des andern Enecklin vnd des Pernhart Notthafften schwester etc. Dise Notthafftin wardt einem Wald= awer Eelichen vertreuet vnd mit dem Auch ein guete Zeit in glicklich[en] wesen gehaust. Seite 11 Anastasia des Berhnarts Notthaffts Schwester gewesen, Balthasar Edlman gehabt. Khunigundt die Elter Im Closter Nider Münster, Herr Hainrichs schwest[er] Mer fritz von Lidtwachs Hausfraw vnd Herr Caspar von Eybs Hausfraw bede Notthafftin vnd auch Ietz Herr Hainrichs Notthafftn auf Runting Schwester. Albrecht Notthafft der dritt des Namens von Wernberg Zu Ahelm= ing vnnd Ratzmstorff etc. des Georg Notthafft sune aus der wolgebornnen Frawen Regina Freyin von Stauff geboren, Herr Hainrich Notthafft des andern Eneckl vnd der Katherina Wispeckhin Prueder, Auch Herr Haim= eran Notthafft des andern Prueder Sune oder vetter etc. Diser Albrecht Notthafft, ein Ernsthaffter man, d[er] thet sich noch In leben seines vatters In dem Bairischen krieg Zu Herr Georgen Wispeckhen, seinen schwag[er], vnnd Nam Auch soldt od[er] dienst An pey dem Durchleutigen Fürsten Hertzog Rueprechten vnd wardt auch ein Hauptman Im selben Krieg. Diser Albrecht Notthafft, auch sein Vetter Hanns Notthafft, haben Paidt auf des Pfaltzgraffen Fail die Herrschafft Ahelming In dem Bayrischen Krieg vor grossen ver- derben Pehuedt vnd eredt. Auch hat sich diser Albrecht sere fast wol gereichert Im Krieg etc. Er hat auch Ein Ewige teglich Mess Zu Windorff Im Marck, In ratzn= marstorffer Herrschafft, Aufgericht vnd bestätten lassen. Diser Albrecht war in grossen vngenaden Pei dem Jetzo Seite 11r Bayrischen Fürsten von Wegen seiner geuebten Hanndlung Im bairischen Krieg, die er volbracht het wider Iren Vatter, Hertzog Albrechten etc. Jedoch so wardt er auf letz Ir Pfleger vnnd Haupt= man Im Waldt Zu Pernstain. Aber er Pelayb daselb nur ain Jar vnnd ward aber mallen versazt. Darnach kam er geen Lenngfeldt In die Pfaltz vnd wardt daselb Pfleger etc. Diser Notthafft het Ime ein Edle Tugenthaffte Junckhfraw verme= helt mit Namen Eyfemia Ein gebornne Preisingerin von Kopffspurgkh, eines ritters dochter mit Namen Herr Jergen Preissinger etc. vnnd alls man hat Zellt 1514 Jar vmb Partholomej hat er sein Hochzeit Zu Fylshoffen gehabt. Er hat auch aus seiner Gemahel gebornen Ainen sonne, Onoferus genanndt. Alls er aber nach seines vatters Absterben Piss in das viiij Jare geregiert het, ist er Zu Regenspurg gestorben Als man Zellt hat 1520 Jar Am tage Lam= pertj des heiligen Marterer Zu des Kayser Karls des v. seiner Erwellung Zum Remischen reich, auch Zu denn Zeitten der durchleuchtigen Fürsten Hertzog Wilhelm vnnd Ludwig Jrer Regierung In Bayrn etc. Aber sein Leichnam wardt Zu Straubing pey seine[n] voreltern begraben, dem got genadt. Amen. Caspar Notthafft der ander des Namens von Wernberg Zu Ahelming vnnd Lotzmstain etc. Herr Hain= rich Notthafften des iiij sune aus der Edlen vnd dugenthafften frauen Barbara von Rorbach geboren, herr Hainrich Notthafft des ij Enneckl vnnd des Hanns Notthafften des ersten Prueder etc. Diser Caspar Notthafft wardt In seiner Jugendt Seite 12 Am Hoffe pey Hertzog Albrechten dem iiij etc. Als er aber Zu seinen voigtparen Jaren kam, do wardt Ime gar ein edle wolgebornne Junckhfraw mit Namen Barbara, Ein geborne Trucksässin vnd freyin von Walburgkh etc. Eelich ver= meheldt. Aus der er fül sune vnnd dochter hat geboren. Diser Caspar Notthafft hat Erstlich dem Bischoff von Aich= stett Ein Pfleg, Zu Neuenmarckh genandt, verwest, Nach= mallen kam er gen Eckh am Waldt vnd wardt Hertzog Albrecht des iiij Pfleger. Ein Zeitlanng darnach ward er Zu dem Neuenmarckh Im Rottal Pfleger. Nach dem Bayr= ischem Krieg, darnach vber lanng, kame er genn Dinglfing vnnd ward auch daselb Pfleger. Nachmallens vber ettliche Jare kame er auf den Nadernbergkh vnnd ward Pfleger daselben auf aller letzt. Do kame er in Walldt geen dem Pernstayn vnnd wardt Pfleger vnnd Hauptman. Daselben ist er auch beliben Pys er starb etc. Diser Notthafft vnnd auch sein vetter Georg Notthafft haben Paidt auf Hertzog Albrechten Tail Im Bayrischen Krieg die Herrschafft Ahelming vor verderben vnnd schaden erred vnnd behuet. Er wardt auch Zu Ritter geschlagen von Kunig Maximilian Als man die Pehaym het erlegt pey Regenspurg, Aber er hat Ir Nie gefuertt. Diser Notthafft hat mir auch die Mess Zu Yserawe verlihen Nach absterben Herr Hannsen Anna von kuntz[en], Als man Zellt het 1515 Jar Am tag Simonis Jude der heilligen Zwelffpotten. Auch hat er mir als der Elter vnnder seinen Vettern der Notthafften die Possession der Pfarr hie Zu Ahelming eingegeben. Nach Ostern Als man Zelt hat 1518 Jare. Diser Caspar Notthafft het sich erstlich der guldt vnnd einkhumens Zu Letznstain Petragen vnnd sein brueder Seite 12r Johanns Notthafft Alss der Junger des dritten taill Zu Ahelming petrag[en]. Darnach vber ein Zeit, Alss der Hanns Notthafft Dienst vnnd Ampter pey dem Bischoff von Regenspurg vber kame, do Praucht er sich der Lotznstain mit seinem einkhomen vnnd diser Caspar Notthafft praucht sich alls dann des Tritten tails mit seinem Einkhomen Zu Ahelming In der selben Herrschafft. Als aber diser Peruembt Notthafft Etwo Lange Zeit Nach absterben seines vatters geregiert het, ist er sellig= klich In got entschlaffent Zu Pernstain, Als man Zellt hat 1520 Jar am Dritten tag vor Michaelis, Zu der Zeit des Remischen Kunig Karls des v. als er erst Im selben Jare erwellet was waren vnd der durchleuchtigen fürst[en] Hertzog Wilhelm vnnd Ludwig gebrueder, baiden Regier= enden Fursten Inn Bayrn. Aber sein Leichnam wardt Zu Straubing begraben, dem got genadt. Amen. Hanns Notthafft der erst des Nammens von Wernberg Zu Ahelm- ing vnnd Lotznstain etc. Herr Hainrich Notthafft des iiij Sune aus der Edlen dugenhafften Frawen Barbara von Rorbach geboren, Herr Hainrich Notthafft des andern En= eckl vnd des vorbenenten Caspar Notthafften des anndern brueder. Diser Hnns Notthafft hat Zway Ee Weiber Nacheinander gehabt, die erste war ein Nustorfferin vo[n] geschecht, Aus der er auch Ettlich Khinder hat geboren, sein sun aber gestorben. Die Annder wardt ein Watzmarstorfferin von Leuprechting geboren, aus der er auch hat geboren. Seite 13 Diser Hanns Notthafft schlueg sich an Hertzog Rueprechten Ime krieg mit Diennst vnd deshalben Er vnd sein vetter Albrecht Nott= hafft die Herrschafft Ahelming Im Bayrischen Krieg Erredt vor Verderben etc. Diser Hanns Notthafft hat Lannge Zeit dienst bey dem Bischoff von Regenspurg gehabt vnnd Pfleger Zu Hochenwurgk gewesen. Er hat auch das Schloß Lotzenstain gar woll Auff das köstlichest Ausgebaut, Erstlich gebrauchet sich diser Notthafft Alss der Jungst des dritten Tails der Herrschafft Ahelming Nachmalls Als er dienst bey dem von Regenspurg vberkame, So gebraucht er sich des Einkomens Zu Lotznstain vnnd liess seinen brued[er] Caspar Notthafften Zu Ahelming Als dem Elterm Herschen. Als in aber das sellig Zu Andern het troffen, Do starb er Als man hat gezellt 1528 Jare, Zu den Zeiten Kayser Karls des v. vnd hertzog Wilhelm des vierten etc. Ottilia Puechpergerin Zu Hoffkirchen, Ein gebornne Notthafftin von Wermberg vnnd Ahelming etc. des Caspar Notthafften des ij Dochter auß der wolgebornnen frawen Barbara Freyin vnnd Truckhsessin von Wald= burgk geboren, Herr Hainrich Notthaft des iiij Ennecklin vnnd des Hanns Notthafften des Ersten Prued[er] Docht[er] Oder Pass etc. Diese Notthafftin hat sich Zu Andre Puechperger verheurat vnnd pey dem erobert ein khindt, das starb auch, lebt sy nit Lang vnd starb auch paldt, vnd wardt Zu Hoffkürch[en] In der Pfarkürchen Zu vnnser Frauen begraben, Als man Seite 13r Zelt hat 1521 Jare, Zu den Zeitten Kayser Karls des v. vnd hertzog Wilhalm des iiij, Auch Hertzog Ludwigs des 14 Der baider regierenden Fürsten In Beyrn etc. Der got genadt, Amen etc. Georg Notthafft der ander des Namens von Wernberg Zu Ahelming vnd Letznstain etc. des Caspar Nothafften des ij. sune aus der Edlen Wolgeboren Frawen Barbara Trucksessin vnd Frey= in von Wallburgkh geboren, Herr Hainrich Notthafft des iiij Enecklin, vnnd des Hans Notthafft des ersten brued[er] sune od[er] vetter. Diser Notthafft, Noch als ein Jüngling kam Zu seinem Vetter Hanns Notthafft Zu Lotzmanstain vnnd starb Im Herbst Als man Zelt hat 1529 Jare. Onoferus Notthafft der Erst des Namens von Wernbergkh Zu Ahelming vnnd Eckh etc. des Albrecht Notthafften des dritten sune aus der Edlen vnnd Tug= enthafften Frawen Eufemia von Preising geboren, des Georgen Notthafften des Ersten Enecklin etc. Diser Onofferus Als sein Vatter starb war Pey iiij Jaren allt, Darnach vber ain Jare, do ver= mehelt sich sein fraw Muetter mit Ee= lichen Wesen Zu dem Ludwig Pentzen= awer Zu Wildenholtzen, der Zeit Mar= schalckh Am Hof Zu Landshuet. Alls Aber auch sein Muetter Starb, Alls man hat Zelt 1528 Jare, do wardt diser Jungling von seinem Pfleg vatt[er] Seite 14 Geen Behaim geschickt And des Kunigs Ferdinanten Hoff, da selb Lebt er nit vil vbers Jar vnd starb als man Zellt 1529 Jare, seines Allters Im 14 Jare. Dem got genadt, Amen. Hainrich Notthafft der fünfft des namens von Wernberg Zu Runtting, ritter, Herr Hainrich Notthafft des iij Sune, Aus der Edlen vnd Tugent= hafften Frawen Margrethen, Ein Pfluegin von Rabenstain, geboren, Herr Albrecht Notthafft des ij Enneckl etc. Diser H[er]r Hainrich Notthafft hat also baldt nach absterben seines vatters Zu Regieren Zu Runtting angehebt vnnd Ime wardt ein Edle Tugenthafften Junckhfrawen mit Namen Anna, Ein gebornne Frawenbergerin, Herr Georgen Fraun= bergers von Haidberg vnnd gotterstorff etc. dochter Eelichen gegeben. Aus der er ettlich döchter vnd gar vill sune hat geboren etc. Dieweil aber diser Herr Hainrich Auff heuttigen tag mit sampt seinem gemahel Noch in Leben ist, so wil Ich sein khunfftige regierung vnnd guett thaten den Zu khunfftigen Chronickh= schreiber Pefelchen haben etc. Seite 14r Margreta von Seckendorff Ein gebornne Notthafftin von Wernbergk vnd Ahelming etc., des Caspar Notthafften des and[er]n Dochter, Aus der wollgebornnen Frawen Barbara Trucksässin vnnd Freyin vonn Wallburg geboren etc. Dise Notthafftin kam Zu der Durchleu= chtigen Fuerstin Susanna Zu der Marck= gräffin In Ir Frauen Zimmer gen Ans= pach vnnd wardt Nachmallens von der selben Fürstin vnd auch Ires gema= hels vom Margrafe Casimiro eine[m] von Seckendorff Eelichen vertreuet vnd mit dem sy noch Pis hieher In glückselligen wesen gelebt hat vnnd auch schon khindt erworben, etc. Stolastica Schwartzenberg[er]in etc. Ein gebornne Notthafftin von Wern= bergkh vnnd Ahelming etc. des Caspar Notthafften des andern Dochter, auch aus der wolgebornnen Frawen Barbara Trucksässin vnnd freyin von Wall= burgkh geboren etc. Dise Junckhfraw Scolastica kam noch also Junge mit Iro Fraw Muetter In Hertzog Wilhelms Fraw Zim[m]er vnd Irer Fraw Muetter wardt Hofmaisterin vber des gedacht[e]n fürsten frauen Zimmer Zu Minchen vnd Ettlich Jar darnach wardt dise Junckh= fraw Stolastica Einem dem von Schw= artzenberg vermeheldt, mit dem sy In glückhsellig[en] wesen gelebt etc. die weil auch dise Tugenthafft fraw mit sampt irem Herrn vnd gemahel In leben ist, will ich ir baider regierung den künfftig[en] schreiber beuolch[en] haben. Seite 15 Kunigundt Kloster Fraw Zu Nidern Münster Zu Regenspurg Ein gebornne Notthafftin von Wernbergkh vnd Ahelming etc. des Caspar Notthafften des ij Dochter Aus der wolgebornnen frauen Barbara Trucksessin vnd freyin von Wallburgkh geboren etc. Dise Junckhfraw Kunigundt wardt Jungerhait von Iren Elttern In das Frawen Closter gegeben vnd darinnen auferzogen vnd gar einge= geben vnd darinnen füll Jar beliben Pis das die Pöß Luterisch Ketzerey vber Hanndt het genomen, do kamen gar fül aus dem kloster, Also kam auch dise Notthafftin Zu Ir schwester Zu d[er] Säckendorfferin etc. Cristoff Joachem Nothafft der erst des Namens von Wernberg Zu Ahelming vnd Lotznstain etc. des Caspar Notthafften des ij Sune aus der woll= gebornnen Frawen Barbara Truckh= sässin vnnd freyin von Wallburgk ge= born, Herr Hainrich Notthafft des iiij Eneckl vnd des Hanns Notthafften des ersten Prueder sune oder vetter, Auch der Ottillia Puechperg[er]in vnd des Jung[en] georgen Notthafften des andern, Auch der Margareth Sägkhendorfferin, vnd der Stolastica Schwartzenberg[er]in, dar= Zw der Kunigundt Kloster fraw etc. Prued[er]. Diser Notthafft, ein Jüngling gross gemueths mit vil Tugenten hoch geziert, der noch also Junger von seinen Eltern Zw Studier= ung wardt angehaldt[en], Auch deshalben Auf die vniuersitet geen Inglstat geschickt wardt, vnd daselben Ettliche Jar die Zeit Seite 15r mit fleissiger Studierung verzeert hat, Als aber sein Vatt[er] mit todt verschiden war, da kame er von Inglstat geen dem Pernstein Zu seiner fraw Muetter vnd belib pey Ir Pis Zu Liechtmes, da khame er mit sampt seiner fraw Muetter Heer gen Ahelming vnd hueb Zu Regieren, vnd hielt mit seiner fraw Muett[er] hauss hie Zu Ahelming, Pis in das ander Jare, Als man Zellt 1522 Jare Am Pfintztag Nach dem Pfingstfeirtag, do verpran schier dz ganntz Dorff Ahelming vnd geschach merckhlich gross verderben etc. Nachmallen vmb Sandt Michaelis tag, Als Hertzog Wilhelm sein HochZeit het mit d[er] Durchleuchtigen Fürstin Frawen Jacoba, Ein gebornne Marggrauin Von Bad[en] p., do wardt dises Jungen Notthaffen Fraw Muetter Oberste Hofmaisterin vber des gedachten Fursten Frauenzimmer Zu Minchen, sollichs Ampt hat sy Erlich verricht Pis das man ge= Zelt hat 1531 Jar, Am ersten tag January ist sy selligklich In got entschlaffen, der got genadt etc. Diser Tugentreich Notthafft kame an Hoff mit Diensten Zu dem Durchleuchtig Fürsten Hertzog Ludwigen geen Landshuet Alls man Zellt hat 1522 Jare etc. er ward auch Manigfeltigklich mit and[er]n von dem gedachten Fürsten In di krieg geschickht vnd gepraucht, Als Zu dem Fränckisch[en] Krieg vnd Zu dem krieg der Bauern auffruer, Auch Zu dem Saltzburgisch[en] Krieg etc. darin er sich alweg Manlich vnd wolgehaldten. Diser Notthafft hat auch die Mess Zu Yseraw, Alls der Elter vnntter den Notthaff[en], Herr Andre Byberl genedigclich verlihen vnnd Ime geen Passaw Presentiert nach vbergab Herr Geörgen Rettingers, Alls man Zelt het 1523 Jare Im Aduent etc. Diser Notthafft hat noch Pis hieher kain Eelich[en] gemahel gehabt, Demnach ich ein lere sparinn In seinem schüldt hab lassen. Ob sich begab vnd Zu trüeg, das er sich mermehelt, das man auch derselben Wappen darain mecht machen etc. dieweill auch Seite 16 dann diser Tugentreich Notthafft Noch in leben vnnd am Hoffe Zu Landshuet ist, will ich sein kunfftige Regierung Auch hie mit andern Peuelchen haben etc. Haimeran Notthafft der dritt des Namens von Wernbergkh Zu Ahelming vnnd schneyding etc, des Pernhardt Notthafft des Ersten Sune Auss der Edlen dugenthafften Frauen Barbara Layming[er]in von Ahaym geboren, Herr Haimeran Notthafft des Andern Eneckl vnd des her= nachbenanten Herr Hanns Jacob Notthafft[en] Prued[er] etc. Diser Notthafft, Ain Pehertzter Jüngling, der Eren vnnd Ruemss ge= gierig, welcher noch Also Junger nach ab= sterben seines vatters von sein[er] fraw Muetter Zu Lernung wardt angehallt[en], Auch deshalben geen Inglstat auf die vniuersitett geschickt wardt, darnach als der Fürst Hertzog Ernst selb an dz Bystumb Passaw kame, do thette sich diser Notthafft mit Diensten an seinen Hoffe geen Passaw vberlanng, Darnach als der gedacht Hertzog Ernst, Administrator des Hochstifft Passaw, die Nott= hafften Ansprach vmb Ire herrligkait Ahelming, do kame diser beruembt Notthafft wider von dem Hoffe vnnd kam Zu seiner Fraw Muetter heer geen Ahelming. Paldt darnach in der Pauern Auffruehr Zu saltzburg, da Nam er diennst an, Nach dem selb[en] Nam er auch Dienst An geen Vngarn von Künig Ferdinant wider graff Weyda etc., In wellichen krieg Er vill versuecht vnd erliden hat etc. Darnach, alls man hat Zellt 1528 Jare, da Wardt Ime ein Edle Dugentreiche Junckhfraw, Mit Namen Margar= etha, Ein gebornne Seiboltstorfferin Aus der schenckhenawe Ee= lich[en] vertreuet vnnd vor sandt Katherina tag In d[er] negst[en] woch[en] daruor haben sy Ir Hochzeit gehallt[en] hie Zu Ahelming In der Seite 16r Vesten Zu Iseraw vnnd ein grosse Freundtschafft Zu Paid[en] seitten vom Adl versamelt, da in d[er] Hochzeit gewesen etc. Darnach Im negsten Jare darnach, da kame dises Notthafften Fraw Muet[er] An Hofe geen Neuburg vnd wardt des Durchleuchtig[en] Fürsten Hertzog Othainrichs Oberste Hofmaisterin vber sein Frawen= Zimmer Zu Neuburg, da selb ist sy noch Pis hieher In grossen Eren gehaldten etc. Diser Tugentreich Peruembt Notthafft wardt des Durchleuchtigen Fuersten Hertzog Ludwigs Zu Filshoffen Landtpfleger Als man Zellt 1531 Jar, die selb Pfleg hat er noch pis hieher von Haus auss beritt[en], dem dieselb Pfleg kain Aygen Pfleghaus hat etc. Diser Notthafft hat auch bey seiner Eegemahel Ein schenne Docht[er] Erworben, mit Namen Anna, die noch Pis hieher In leben gewesst. Hanns Jacob Notthafft der erst des Namens von Wernberg Zu Ahelming vnnd schneiding etc. ein Teutscher Herr Zu Elling Im francken= lanndt etc. des Pernhardt Notthafft des ersten Sune auß der edlen vnd dugenthafften Frawen Barbara Laymingerin von Ahaim geborn, Herr Haimeran Notthafft des ij Eneckl vnnd des yetzo vorbene= nten Haymeran Notthafften des dritten Brued[er] etc. Diser Nott= hafft, ein Jüngling gross vnnd Ernstlichs gemueths, wellcher sich noch also Junger auß radt vnnd maynunng seiner Frauen Muetter auch and[er]n seiner freundt In den Orden der Teutschen Ritter= schafft willigklich hat gegeben, vnd den selben Orden Seite 17 hat an sich genomen Zu Elling Im frenckischen Landt, Alss man hat gezelt 1524 Jar Im Herbst vnd auch also die Ritter= schafft Empfanngen, In Wellichen Orden er noch Piß hie= her In Dugenten gross hat aufgenomen vnnd die weil dann diser Dugentreich ritter, Herr Hanns Jacob Nott= hafft diser Zeit Noch in leben ist, will ich sein künfftigj guett thatten vnd Leben denn Zu khünffig[en] kronickh= schreiber hiemit haym gestellt haben. Hie Endet sich dise Chronica von dem hoch Edlen geschlecht der Notthafften von Wernberg Zu Ahelming vnd Runtting etc., die Alle Iren Vrsprung herr haben von dem Edlen gestrenngen Ritter, Herr Albrecht Notthafft, welch[er] Auss Holandt ist herkhumen mit dem Durchleuchtigen Fürsten vnnd Herrn, Herrn Hertzog Albrechten dem ersten etc. In diss Bairlandt von Ainem auf den Andern Piß hieher In das 1531 Jar, vollendt Am x. des Monats Augusti etc. Gott sey Lob in Ewigkait vnd hinvber. Amen. Seite 17r Hienach Volgend das Register vber dise Chronica mit der Zall der bletter, wo man v[on] einem Notthafften lesen soll etc.
Seite 18
|
